Поэзия Марьяны Кочесоковой

на кабардинском языке

Автор: Марьяна Кочесокова

***

Пшэхэр зэхуэсмэ – уэлбанэ,

ЦIыхухэр зэхуэсмэ – бэлыхь.

Сэ дэтхэнэ зы Хасэми хуэсщIкъым дзыхь.

***

Уи Iум къикIыр си Iум къепхъуатэ,

Уи гум къикIыр – си…

ГурыIуатэ.

(ГурыIуэгъуэу мыпсалъэ гупым

сыкъыхокIри – согъуэлъ

уи гупэм).

***

Къалэр цIыкIумэ – цIэрыIуэр щыкуэдщ,

си цIэр къизымыIуэр укIуэдыж,

соусэ – схуаус уэрэд

(зи нэфI игъащIэкIи сыхуэмейм

къысщохуэ и ней);

нобэ сыпсэунущи – гукъыдэмыж,

зыслIэжынущи – сызыщосхьыж…

Сыдахэнути – сымыуэд…

ХэкIыпIэр – сокIуэд.

ЩыIэкъым къысхуеин –

къалэм (ирецIыкIу, иреин)

кIуэдар къыщамылъыхъуэ,

темылъмэ ахъшэ щIыхуэ.

Сэ стелъкъым.

***

уафэр щабэу ныжэбэ щIым къеIэбащ,

уэсыр уафэм и бащ.

ФIэфIщ дунейм щIымахуэну…

Сэ уи деж сынэкIуэнущ –

сыщIэгъыхьэ, –

мыбжьыхьэ къэсшар,

сымыпыхьэ.

– т-с-с…

Сыпхуэзэшат.

***

Сыхуейт щIыIу издэжыну джанэм, –

уи джанэм… Сыт къызыхэсхар?

СфIыщыужащ мастэ-Iуданэм

си Iэпэ тхэным дихьэхар.

***

ЖысIакъым цIутI, сыпкIэлъыгъа къудейщ.

Къайгъэ къэхъуну, пщIэрэ, сыхуеякъым,

ауэ зэхэтщ мыпхуэдэу мы дунейр:

цIыху нэпсым, кIэщIэбгъэувэми шынакъыр,

гува-щIэхами, псыщи, хым хуокIуэж.

Къолыбыр хыр! Ирех ихъуреягъыр.

ЖаIэнщ иужьк1э Тхьэуэ ар зи ягъэр.

Хьэуэ, зи ягъэр уэрщ! Зэгъэзэхуэж.

***

Ди къалэм махуэ къэс зеузэщI:

щхьэгъубжэм дэплъи – жыг мыгъагъэ –

зыгуэрым ищIри сымаджэщ,

къыфIидзэжащ «Фыкъытхуеблъагъэ!»

***

Дунейр щымыджэмыпцIэу

си псэр щызэпцIагъащIэм —

IэфIым щIидзакIэт гуащIэ,

хужьми хидзакIэт фIыцIэ.

…Дунейр щымыджэмыпцIэм

Псэкъутэжыгъуэр къэсат.

***

Уэсрэ уэрэ…

Усэрэ сэрэ…

Уэрэ сэрэ

нэхъыфIу пIэрэт?

***

ЛъхукъуэлIылъ псыдзэм сыщызэридзэкIэ

Уэркъылъ ткIуэпсым сыкърегъэл.

One thought on “Поэзия Марьяны Кочесоковой

Добавить комментарий

Ваш e-mail не будет опубликован.