Поэзия Альбины Анкваб (на абхазском языке)

Автор: Альбина Анқәабԥҳа

АЖӘЕИНРААЛАҚӘА

***

Ашәа сҳәоит, исҳәоит сара

Сыбжьы иарҿыхоит с-Аԥсынра.

Сшьа-сда зегь ашәаны,

Жәлар ирысҭоит изаны.

Сашәабжь ааргоит сыга, сышьха,

Ҵәахышьа амаӡам сыгәҭыха…

Аԥша ишьҭырԥраан иаанагоит,

Ижәҵыс ԥшқоушәа абжьы гоит.

 

***

Ишыхшәара иҟоу,

Ашәҭыц  иаҩызоу,

Са сгәыԥшқара, –

Са сгәыӷра.

Жәа ҟәандак,

Акәиц еиԥш,

Сгәаҵа инҭашәар,

Сгәаҿы зегьы арҿыхарын,

Сгәыӷрақәагь еиқәхарын.

Ҿымҭ са сгәыԥшқара,

Сыжьжьарын!

Ашәҭыц афҩыхаара,

Саҳарын!

 

***

–Ажәа мыцхә аҳәара сҭахым,

Ажәакала усҭахым.

Иҟалозар наҟ усԥырҵ,

Сымҩахәасҭагьы уаныҵ!

– Ус бымҳәан, сгәы ныбмырхан,

Аҵх еиқәаҵәа схабмыртәан,

Сгәы ахызаҵә ҭабмыршәан,

Бнапала бышәҭыц ҿыбмыршәан.

–Аԥсҭазаара атәы умҳәан,

Суҳәоит, сгәы нумырхан.

Сара сыҟоуп аӡәы изы,

Хьаҵшьа сымам аказы!

–Ажәа мыцхә аҳәара аҭахым,

Избоит сара зынӡа сыбҭахым…

Ҽаӡә имца балашәеит бара,

Насыԥуп уаҟа абылра…

 

***

Сыҩнра бгәараҭан иббар, –

Наунагӡа са быстәхар

Бшьапы зхьысуа ашьац,

Ираҳаҭӡа сыԥсы снаршьарц.

Са сыхгыланы сцаларын,

Сааџьабшьартәы сҽырбарын!..

Са сыҩнра бара бабар,

Сӡыхь ишацларыз ббарын,

Ҳҩыџьагь уи аӡыхь ҳахәарын,

Ҿамҩа-ҿамҩа иаҳжәларын.

Шьыри-шьыри бӡыхь снархәа,

Знызаҵәык сӡы агьама ба,

«Шаҟа иссирузи!» – быҽхәа

 

***

Ҩ-дунеиктәи ҳаҵх аҿы,

Уареи сареи ҳаицнаӡеит.

Акылаԥшра иаҿыз аԥацхаҿы,

Амза ԥхашьан, аҽаӡеит.

Аеҵәақәа аҵх рҽаларӡ,

Адгьыл иакәшарцы рыӡбеит.

Алашьцараҿ сгәаҵа иҭаларц,

Зҽызшьуаз уажәа еиқәсырхеит!..

Аҵх лашьцараҿы,

Уареи сареи ҳаизынхеит.

 

***

Удунеи аҿы умаӡа ҵәахуп,

Ашә аартны сҭаԥшырц сҭахуп.

Араҟа ԥсы зхоу зегь мыцхәуп,

Сараӡәк аҳкәажәҵас сахуп!..

 

***

Аҵхқәа цоит, амшқәагь цоит,

Зегь неицылар ишықәсқәахоит.

Аҵхқәеи амшқәеи нҵәаӡом,

Угәы  аҿымҭра иԥнаҵәаӡом.

Сара урҭқәа сгәы ндырхоит.

Сыцәа рҟьалан, иҭадырхоит.

Амшқәа ахьцо ҳәа акгьы збом,

Сыҩуа срышьҭалар, сыргом…

Ухаршҭрагьы сгәы иснаруам,

Исҳәарц исҭаху снарҳәауам.

Сгәырҩа ахреиҧш саҿахеит,

Еиҭах сымала сынхеит.

 

***

Сыԥхыӡ салоуп са сԥыруа,

Гәаныла сушьҭоуп сыԥшаауа.

Издыруада џьа снухьыԥшыр,

Знызаҵәык ма снауҿаԥшыр.

Усҟан, сгәы ахала ишәаҳәарын,

Адунеи зегь сара истәхарын.

Сымаӡа шымаӡоу инхарын,

Сыԥхыӡ лакә салҵны сцарын.

Ашьыжь сашәа хааӡа,

Аԥсаатә срацлабрын маӡа.

Сыгәҭыха урҭ идсырҳарын,

Анцәа иҟынӡагь инаӡарын.

 

***

Сгәыдкыл, сгәыдкыл, сыԥшалас сгәыдкыл,

Схәыцрақәа зегь уара иудкыл,

Суҳәоит,  исмырбакәа зегьы сцәугарц…

Схы-сгәы иҭоу зегьы сызҭугарц!

Мап анакәха – сгәы ԥнажәоит,

Схәыцрақәагьы ажьеиԥш ишәоит…

Узқәымгәыӷуа ажәак сыҿшәоит,

Угәы иҭамшәакәа – икашәоит…

Сгәыдкыл, сгәыдкыл, сыԥшалас сгәыдкыл,

Схәыцрақәа зегь уара иудкыл.

 

 

***

Сныҟәо сцоит,

Ашьац сырҽуеит,

Сышьҭа анысҵоит

Иԥшӡахоит.

Лаԥшык саӡоит,

Лаԥшык сарԥхоит!

Сышьҭа ухылар,

Уеиқәсырхоит!

 

***

Аҿаҩаҿы – уара,

Агаҿа – сара,

Ҳабжьара – аԥшьаҭыԥ,

Ахан – аҭыӡҭыԥ!

 

***

Маӡа,  маӡа ушьҭа схуп.

Маӡа сгәыӷуа са сыԥшуп.

Маӡа умҩа сара искуп.

Маӡа уныҳәаны ушьҭуп.

 

***

Аԥша ҵәыҵәы,

Сӡамҩа анагәӡуа,

Ихьшәаашәаӡа,

Ашьҭа аннаҵоит.

Уа иугәаҕьыз,

Иудыруаз ушақәӡуа!

Аҧша хага.

Сахьӡаны исыршәоит!..

 

***

Сгәы шәындыҟәрахеит уаха,

Избом иаазыртыша ацаԥха!

Сашьҭоуп, сашьҭоуп сыԥшаауеит,

Исыԥшааит шысҳәо  –  аҽаӡауеит!

Добавить комментарий

Ваш e-mail не будет опубликован.